(രചന: പ്രജിത്ത് സുരേന്ദ്രബാബു)
(©️ᴋᴀᴅʜᴀᴋᴏᴏᴛᴛᴜ ഈ കഥയുടെ കോപ്പിറൈറ്റ് ഞങ്ങൾ വാങ്ങിയിട്ടുള്ളതാണ്.. ഞങ്ങളുടെ അനുവാദം കൂടാതെ ഈ കഥകൾ മറ്റെവിടെയും പോസ്റ്റ് ചെയ്യാൻ പാടുള്ളതല്ല)
“എങ്ങിനേലും ഒന്ന് നോക്ക് ചേട്ടാ.. വേറെ എവിടെയായാലും കുഴപ്പമില്ല. ഈ വീട് പറ്റില്ല അതാ.. ”
നന്ദിനിയുടെ അപേക്ഷ കേട്ട് അനിൽ ആകെ കുഴഞ്ഞു.
” എന്റെ പൊന്ന് നന്ദിനി ഈ സിറ്റിയിൽ ഇരുപതിനായിരം രൂപ വീട്ടു ജോലിക്കാരിക്ക് തരുന്ന വേറെ ഏത് വീടുണ്ട്. അതും വേറേ ഒരു പണിയും ഇല്ല ആ വയ്യാണ്ടിരിക്കുന്ന ചെക്കനെ ഒന്ന് നോക്കണം പിന്നെ പാചകവും…
അത്രയല്ലേ ഉള്ളു. ആ കൊച്ചന് ആണേൽ ആകെ പതിനഞ്ചു വയസ്സ് മാത്രം പ്രായം… നിനക്ക്‌ പിന്നെ എന്താണ് അവിടെ പ്രശ്നം ”
ആ ചോദ്യത്തിന് മുന്നിൽ മൗനമായി അവൾ.
” എടോ നിന്നെ പരിചയം ഉള്ളത് കൊണ്ടും നിന്റെ കഷ്ടപ്പാടുകൾ അറിയാവുന്നത് കൊണ്ടും പത്ത് പൈസ കമ്മീഷൻ പോലും വാങ്ങാതെയാണ് ഞാനീ ജോലി നിനക്ക്‌ തരപ്പെടുത്തിയത്.
എന്നിട്ടിപ്പോ അതു വേണ്ട ന്ന് ആണോ.. വേറേ ഇപ്പോൾ നിലവിൽ വേക്കൻസികൾ ഒന്നുമില്ല.. താൻ അവിടെ അഡ്ജസ്റ്റ് ചെയ്യ് തത്കാലം.. വയ്യാതെ കിടക്കുന്ന കെട്ട്യോനെങ്കിലും മരുന്ന് വാങ്ങാലോ.. ”
ഇനി അനിലിനോട് കൂടുതൽ സംസാരിച്ചിട്ട് കാര്യമില്ല എന്ന് മനസ്സിലായതോടെ പതിയെ എഴുന്നേറ്റ് പുറത്തേക്ക് നടന്നു നന്ദിനി.
അനിൽ പറഞ്ഞത് ശെരിയാണ് അച്ഛനും അമ്മയും കോളേജ് അദ്ധ്യാപകരായ പതിനഞ്ചു വയസ്സ് പ്രായമുള്ള ആദർശ് എന്ന ആൺകുട്ടിയെ നോക്കുക മാത്രമാണ് അവൾക്ക് ആ വീട്ടിൽ ഉള്ള ജോലി.
ഈ ചെറു പ്രായത്തിൽ ബൈക്കുമായി കറങ്ങാൻ ഇറങ്ങി വലിയൊരു അപകടത്തിൽ പെട്ട് കാലിനു നല്ല പരിക്ക് പറ്റി വീട്ടിൽ റെസ്റ്റിലാണ് അവൻ.
പക്ഷെ അനിലിനെന്നല്ലേ ആർക്കും അറിയില്ല അവൻ തന്നെയാണ് നന്ദിനിയുടെ പ്രശ്നവും എന്നത്.
നാല്പതു വയസിനു താഴെ പ്രായമുള്ള കാണാൻ സുന്ദരിയായ നന്ദിനി ആ വീട്ടിലേക്ക് ചെന്ന അന്ന് മുതൽ അവളോടുള്ള ആദർശിന്റെ നോട്ടവും പെരുമാറ്റവും മറ്റൊരു രീതിയിൽ ആയിരുന്നു.
കാലിനു പരിക്ക് ഉള്ളതിനാൽ തന്നെ നടക്കാൻ ഏറെ ബുദ്ധിമുട്ട് ഉണ്ട് അവന്. പലപ്പോഴും പിടിച്ചെഴുന്നേൽപ്പിക്കുന്നതും നടത്തുന്നതുമൊക്കെ നന്ദിനിയാണ്.
ആ അവസരം കൃത്യമായി അവൻ മുതലാക്കുന്നുമുണ്ട്. തന്റെ ശരീരത്തിൽ പലയിടങ്ങളിൽ ഇഴഞ്ഞു നീങ്ങുന്ന അവന്റെ കൈകളെ വളരെ കഷ്ടപ്പെട്ടാണ് അവൾ തടഞ്ഞു നിർത്തുന്നത്.
ചില സമയങ്ങളിൽ അറിയാത്ത ഭാവത്തിൽ ഉള്ള നഗ്നതാ പ്രദർശനം കൂടിയായപ്പോൾ വല്ലാതെ സഹികെട്ടിരുന്നു നന്ദിനി. ഇപ്പോഴിതാ തന്റെ ആവശ്യം മുഖത്തു നോക്കി അവൻ ചോദിച്ചിരിക്കുകയാണ്.
” ചേച്ചി.. ചേച്ചിയെ എനിക്ക് ഫുൾ ന്യൂഡ് ആയിട്ട് ഒന്ന് കാണണം. ചേച്ചി ഒന്ന് സമ്മതിക്ക് ”
അവന്റെ ആവശ്യം കേട്ട് തല ചുറ്റുന്നത് പോലെ തോന്നി നന്ദിനിക്ക്.
” എന്താ മോനെ എന്താ നീ ഈ പറയുന്നേ.. എന്നോട് അങ്ങിനെയൊന്നും പറയരുത് എന്നെ അങ്ങിനെ കാണുകയുമരുത്.. എനിക്ക് ഒരു മോൻ ഉണ്ടായിരുന്നേൽ ഉറപ്പായും നിന്റെ പ്രായമേ ഉണ്ടാകുമായിരുന്നുള്ളൂ ”
അവളുടെ ശബ്ദം വിറപൂണ്ടിരുന്നു. പക്ഷെ പിന്മാറാൻ ആദർശും തയ്യാറല്ലായിരുന്നു.
” സമ്മതിച്ചില്ലേൽ ചേച്ചി എന്നെ നേരെ നോക്കുന്നില്ല എന്ന് മമ്മിയോട് പരാതി പറയും ഞാൻ. ചേച്ചിയെ ജോലിയിൽ നിന്നും മാറ്റും. ഇതുവരെയുള്ള ശമ്പളം പോലും തരില്ല ”
അതൊരു ഭീഷണി തന്നെയായിരുന്നു. നന്ദിനിയുടെ അവസ്ഥ കൃത്യമായി മനസ്സിലാക്കി അസ്ഥാനത്ത് ഒരു ഭീക്ഷണി. അത്തരമൊരു ഭീക്ഷണി നിലനിൽക്കുന്നത് കൊണ്ട് തന്നെയാണ് മറ്റൊരു ജോലിക്കായി അവൾ അനിലിനെ സമീപിച്ചതും. ഇനിയിപ്പോൾ ആ പ്രതീക്ഷയും വേണ്ട.
വീട്ടിലെ ദാരിദ്യം ഓർത്തപ്പോൾ മടിച്ചു മടിച്ചാണ് അന്നവൾ ജോലിക്കായി പോയത്. ജോലി സ്ഥലത്തെത്തുമ്പോൾ ആദർശിന്റെ പപ്പയും മമ്മിയും അവൾക്കായി കാത്തു നിൽക്കുകയായിരുന്നു.
” എന്ത് പറ്റി നന്ദിനി ഇന്ന് ലേറ്റ് ആയത്.. ഞങ്ങൾ നിനക്ക്‌ ആയി വെയ്റ്റിംഗ് ആയിരുന്നു. അപ്പോൾ പോകുവാണെ.. മോൻ അകത്തുണ്ട്.. പിന്നെ വാഷിംഗ്‌ മെഷീനിൽ കുറച്ചു തുണി അലക്കാൻ ഇട്ടിട്ടുണ്ട്. ഒന്നെടുത്തു പുറത്ത് വിരിച്ചേക്കണേ .”
അവളെ കണ്ട മാത്രയിൽ അവർ കാറിലേക്ക് കയറി നിമിഷങ്ങൾക്കകം അവിടെ നിന്നും പോയി. ആ വീട്ടിലേക്ക് കയറുവാൻ ഒട്ടും താത്പര്യം ഇല്ലാതെ അല്പസമയം പുറത്തു തന്നെ നിന്നു നന്ദിനി. അകത്തേ മുറിയിൽ ഇരുന്ന ആദർശ് അവൾ വന്നത് മനസിലാക്കിയിരുന്നു.
” ചേച്ചി… ഒന്ന് ഇങ്ങട് വന്നേ.. ”
നിമിഷങ്ങൾക്കകം അവന്റെ ഒച്ചയെത്തി. പിന്നെ പുറത്ത് നിൽക്കുവാൻ കഴിയാതെ പതിയേ ഉള്ളിലേക്ക് കയറി നന്ദിനി. അറച്ചറച്ചു ആദർശിന്റെ മുറിയിലേക്ക് ചെല്ലുമ്പോൾ ബെഡിൽ ചാരി ഇരിക്കുകയായിരുന്നു അവൻ. അവളെ കണ്ടമാത്രയിൽ അവന്റെ ചുണ്ടിൽ ഒരു പുഞ്ചിരി വിടർന്നു.
” ഇന്ന് ചേച്ചിയെ കാണാൻ നല്ല ഭംഗിയുണ്ട്… അല്ലേലും ഈ സാരി ഉടുത്തു വന്നാൽ ചേച്ചി സൂപ്പർ ആണ്. ”
ആ പ്രശംസ തീരെ ഇഷ്ടമാകാതെ തല കുമ്പിട്ട് നിന്നു അവൾ.
അത് കാൺകെ ആദർശിന് ആവേശമായി.
” ചേച്ചി.. ഇനിയും കാത്തിരിക്കാൻ വയ്യ എനിക്ക്.. ഞാൻ പറഞ്ഞ കാര്യം ഇപ്പോൾ തന്നെ ചെയ്യണം. കൊതിയായിട്ട് പാടില്ല… ചെയ്തില്ലേൽ ഇപ്പോൾ തന്നെ മമ്മിയെ വിളിച്ചു ഞാൻ കംപ്ലയിന്റ് ചെയ്യും… ”
ആ ഭീഷണിയുടെ സ്വരം നന്ദിനിയേ ഏറെ അസ്വസ്ഥയാക്കി
” മോനെ പ്ലീസ്.. എന്നോട് ഇങ്ങനെ ഒന്നും പെരുമാറല്ലേ നീ. നിന്നെക്കാൾ എത്ര വയസിനു മൂത്തതാണ് ഞാൻ.. എന്നെ ഒന്ന് വെറുതെ വിട്.. പ്ലീസ് ”
അതൊരു കെഞ്ചൽ ആയിരുന്നു. എന്നാൽ ആ ഒരു മൂഡിൽ ഇത്തരം കെഞ്ചലുകൾ എല്ലാം ആദർശിന്റെ ഹരം കൂട്ടിയതെ ഉള്ളു.
” ചേച്ചി കൂടുതൽ ഒന്നും പറയണ്ട. ഞാൻ ഒന്ന് കണ്ടു ന്ന് വച്ച് ചേച്ചിക്ക് ഒന്നും സംഭവിക്കാൻ പോകുന്നില്ല.. കൊതി കൊണ്ടല്ലേ ചേച്ചി…
ചേച്ചി വന്ന അന്ന് മുതൽ എനിക്ക് മനസ്സിൽ ഉള്ള ആഗ്രഹം ആണ്.. ഇനി ക്യാഷ് ആണ് ചേച്ചിക്ക് ആവശ്യം എങ്കിൽ മമ്മി തന്ന പോക്കറ്റ് മണി കുറച്ചു എന്റെ കയ്യിൽ ഉണ്ട് അത് തന്നേക്കാം ഒന്ന് കാണിക്ക് ചേച്ചി.. ”
ഇത്തവണ ഭീഷണി പ്രലോഭനങ്ങളിലേക്ക് കൂടി വഴി മാറിയിരുന്നു. മറുപടിയില്ലാതെ നടുങ്ങിവിറച്ചു നിന്നു നന്ദിനി.
” ചേച്ചി പ്ലീസ് ലേറ്റ് ആകല്ലേ.. ആ സാരി ഒന്ന് മാറ്റൂ.. ”
വല്ലാത്തൊരു ആർത്തിയാണ് അപ്പോൾ ആദർശിന്റെ മുഖത്തു അവൾ കണ്ടത്. ഒരു നിമിഷം എന്ത് ചെയ്യണമെന്ന് അറിയാതെ കുഴഞ്ഞു അവൾ.
മനസ്സിൽ പല പല ചിന്തകൾ ഓടി മറഞ്ഞു. അവൻ പറഞ്ഞത് പോലെ ഒരു വട്ടം ചെയ്താൽ തനിക്കിനിയും ഈ ജോലിയിൽ തുടരാം. ഭർത്താവിന്റെ ചികിത്സ മുടങ്ങാതെ ചെയ്യാം..
ഒപ്പം അവന്റെ വക ക്യാഷ് എന്തേലും കിട്ടിയാൽ അതും വലിയ ഉപകാരം ആകും.പക്ഷേ എങ്ങിനെ.. മോന്റെ പ്രായം ഉള്ള ഒരു ചെക്കന്റെ മുന്നിൽ…. മാത്രമല്ല ഒരു വട്ടം കൊണ്ട് അവന്റെ ആഗ്രഹം അടങ്ങുമെന്ന് എന്ത് ഉറപ്പ് ഇനി ഇത് പതിവായാലോ.. ‘
അത്രയും ആലോചിച്ചു നിൽക്കുമ്പോഴാണ് വയ്യാതെ കിടക്കുന്ന ഭർത്താവിനെ അവൾ ഓർത്തത്.അതോടെ മനസ്സ് വീണ്ടും അസ്വസ്ഥമായി
‘ അദ്ദേഹത്തിന് വേണ്ടിയല്ലേ ഞാൻ ഈ കഷ്ടപെടുന്നേ.. ഇപ്പോൾ ഈ വരുമാനം നിലച്ചാൽ അത് വലിയ സാമ്പത്തിക ബാധ്യതയാകും.. ‘
വല്ലാത്ത ആശയക്കുഴപ്പത്തിലേക്കാണ്ടു നന്ദിനി.
” ചേച്ചി പ്ലീസ്… ”
അപ്പോഴും അവളെ നിർബന്ധിച്ചു കൊണ്ടേയിരുന്നു ആദർശ്.
‘ ഇപ്പോൾ വേറെ വേക്കൻസികൾ ഒന്നുമില്ല.. നീ തത്കാലം അവിടെ എങ്ങിനേലും ഒന്ന് അഡ്ജസ്റ്റ് ചെയ്യ്… ‘
അനിൽ പറഞ്ഞ വാക്കുകൾ നന്ദിനിയുടെ മനസ്സിലേക്കെത്തി ഒപ്പം ആക്‌സിഡന്റ് പറ്റി എഴുന്നേൽക്കുവാൻ പോലും കഴിയാതെ കിടക്കുന്ന ഭർത്താവിന്റെ അവസ്ഥയും..
അല്പസമയം മൗനമായി നിൽക്കവേ മനസ്സിൽ എവിടേ നിന്നോ ഒരു ധൈര്യം കടന്നു കൂടിയത് മനസ്സിലാക്കി അവൾ.
” ചേച്ചി ഒരു വട്ടം… ഞാൻ ചേച്ചിയെ ഒന്ന് തൊടുക പോലും ഇല്ല.. ഒന്ന് കണ്ടാൽ മാത്രം മതി”
ആദർശ് നിർത്താതെ അവളുടെ മനസ്സ് മാറ്റുവാനുള്ള ശ്രമങ്ങൾ തുടർന്നു കൊണ്ടിരുന്നു. അതോടെ മനസ്സിൽ ആ ഉറച്ച തീരുമാനം എടുത്തു നന്ദിനി .
തനിക്ക് മുന്നിൽ കെഞ്ചുന്ന അവനെ അല്പസമയം നോക്കി നിന്ന ശേഷം പതിയെ തന്റെ സാരി തുമ്പിലേക്ക് കൈ വച്ചു അവൾ. അതോടെ ആദർശ് ആവേശത്തിന്റെ പരകോടിയിലെത്തി.
” അഴിക്ക് ചേച്ചി വേഗം…. ”
അവൻ ഉച്ചത്തിൽ വിളിച്ചു പറയുമ്പോൾ കയ്യിലെക്കെടുത്ത സാരി തുമ്പ് പതിയെ ഇടുപ്പിൽ ഒന്ന് ചുറ്റി തിരുകി വച്ചു അവൾ. ശേഷം നടന്നു ആദർശിന്റെ തൊട്ടരികിൽ എത്തി
” ചേ.. ചേച്ചി.. എന്താ.. എന്തിനാ അടുത്തേക്ക് വരുന്നെ ദൂരേക്ക് നിന്ന് കാണിക്ക് എന്നാലേ നല്ലോണം കാണുവാൻ പറ്റുള്ളൂ…”
ആ നീക്കം കണ്ടിട്ട് അവന്റെ ആവേശം അല്പം പതർച്ചയിലേക്ക് വഴിമാറിയിരുന്നു. അല്പസമയം അവന്റെ മുഖത്തേക്ക് നോക്കി നിൽക്കെ പതിയെ
നന്ദിനിയുടെ മുഖം കുറുകി.
” നിനക്ക്‌ കണ്ടേ പറ്റുള്ളോ ആദർശ് ”
ആ ചോദ്യത്തിന് അല്പം കനം കൂടിയത് ശ്രദ്ധിച്ചു ആദർശ്. എവിടെയോ ഒരു പന്തികേട് തോന്നിയെങ്കിലും കാണണം എന്ന അർത്ഥത്തിൽ തന്നെ തലയാട്ടി അവൻ.
അതോടെ നന്ദിനിയുടെ മിഴികളിൽ അഗ്നി പടർന്നു.
“പന്ന മോനെ… അമ്മേടെ പ്രായമുള്ള എന്നെ നിനക്ക്‌ തുണിയില്ലാതെ കാണണം അല്ലേടാ .. ”
കവിൾ പൊട്ടുമാറു ഒരു അടി കിട്ടിയാണ് ആദർശ് പിന്നിലേക്ക് വേച്ചു പോയത്. അല്പസമയം ഇടത് ചെവിയിൽ ഒരു മൂളൽ മാത്രമേ കേട്ടുള്ളു അവൻ. എന്താണ് സംഭവിച്ചതെന്ന് മനസ്സിലാക്കിയെടുക്കുമ്പോഴേക്കും ഒരെണ്ണം കൂടി കിട്ടി ചെകിടത്ത്.
അല്പസമയം ബോധം മറഞ്ഞത് പോലെ തോന്നി ആദർശിന്. തിരികെ സ്വബോധത്തിലേക്ക് വരുമ്പോൾ അവൻ കണ്ടു കലി തുള്ളി മുന്നിൽ നിൽക്കുന്ന നന്ദിനിയെ .. ആ രൗദ്ര ഭാവം കണ്ട് സത്യത്തിൽ ഭയന്ന് പോയിരുന്നു അവൻ.
” ചേ.. ചേച്ചി.. എന്താ ഈ കാട്ടിയെ ഇപ്പോൾ മ.. മമ്മിയെ വിളിക്കും ഞാൻ..”
അവന്റെ ശബ്ദം ഇടറിയെങ്കിലും ധൈര്യം കൈ വിടാതെ ഫോൺ കയ്യിലെക്കെടുക്കാൻ തിരിഞ്ഞു. അതോടെ ബെഡിലേക്ക് കയറി ഇരുന്ന് അവന്റെ ഷർട്ടിന്റെ കോളറിൽ പിടുത്തമിട്ടു നന്ദിനി
” പാവപ്പെട്ടവരുടെ നിസ്സഹായാവസ്ഥ ചൂഷണം ചെയ്യണം അല്ലെ നിനക്കൊക്കെ.. വായിൽ സ്വർണ്ണക്കരണ്ടിയുമായി ജനിച്ചതിന്റെ കുത്തിക്കഴപ്പാണ് ഇത്. നല്ല പിട കിട്ടുമ്പോൾ മാറിക്കോളും ”
ചിറിക്കിട്ട് ഒരു കുത്തു കൂടി കിട്ടി ആദർശിന്. അതോടെ മനസ്സിൽ തോന്നിയ ധൈര്യം പൂർണമായും ചോർന്നു കാറ്റു പോയ ബെലൂൺ പോലെയായി അവൻ.
” ചേച്ചി.. സോറി സോറി.. ഇനി തല്ലരുത്.. പ്ലീസ് എനിക്ക് വയ്യാത്തതാണ്…”
പേടിച്ചു പോയ അവൻ തൊഴു കയ്യോടെ കെഞ്ചി അത് കണ്ടിട്ട് അരിശം മൂത്തു നന്ദിനിക്ക്
” ടാ ചെക്കാ.. നീ നിന്റെ തള്ളയോട് പറയ്.. ഞാൻ നിന്നെ നോക്കുന്നില്ല ന്ന്.. ആ സെക്കൻഡിൽ ഞാൻ പോലീസിനോടും പറയാം നീ എന്നോട് മോശമായി പെരുമാറിയെന്ന്..
എന്റെ ജോലി പോണേൽ പോട്ടെ ജോലി ഞാൻ വേറെ കണ്ടെത്താം. പക്ഷേ സ്ത്രീ പീഡനത്തിന് നിന്നെ ഞാൻ അകത്താക്കും… നാട്ടുകാരുടെ മുന്നിൽ നിന്നെ മാത്രമല്ല നിന്റെ കുടുംബക്കരെയും നാറ്റിക്കും.. ”
അതൂടെ കേട്ടതോടെ ആദർശിന്റെ ഭയം ഇരട്ടിയായി.
” ഇല്ല ചേച്ചി ഞാൻ ആരോടും ഒന്നും പറയില്ല.. ചേച്ചിയും ഒന്നും പറയല്ലേ പ്ലീസ് ”
അവൻ കെഞ്ചുകയായിരുന്നു. അത് കണ്ടിട്ട് അല്പസമയം നിശബ്ദയായി ഇരുന്നു നന്ദിനി. അവളുടെ ഉള്ളിലെ ദേഷ്യം അപ്പോഴും കെട്ടടങ്ങിയിരുന്നില്ല.
” ഇനി മേലിൽ… ഇനി മേലിൽ… നീ ആരോടെങ്കിലും ഇതുപോലെ മോശമായി പെരുമാറി എന്ന് അറിഞ്ഞാൽ.. നിന്റെ മണി ചെത്തി ഞാൻ പട്ടിക്കിട്ട് കൊടുക്കും.. ഇത് വെറും വാക്കല്ല.. ഓർത്തു വച്ചോ.. ”
അത്രയും പറഞ്ഞു കൊണ്ട് അവൾ എഴുന്നേറ്റു. അതൊരു വെറും ഭീക്ഷണിയായി തോന്നിയില്ല ആദർശിന്.
അപമാന ഭാരത്താൽ അവൻ തല താഴ്ത്തിയിരിക്കുമ്പോൾ ആ മുറിയിൽ നിന്നും പുറത്തേക്കിറങ്ങി നന്ദിനി. എന്തെന്നില്ലാത്ത ഒരു ആശ്വാസം അപ്പോൾ അവൾക്ക് അനുഭവപ്പെട്ടു വലിയൊരു പ്രതിസന്ധിയിൽ നിന്നും മോചിതയായി എന്ന് തന്നെ വിശ്വസിച്ചു അവൾ.
“അല്ലേലും പെണ്ണിന്റെ മാനം കാക്കാൻ എപ്പോഴും ആരേലും കൂടെ ഉണ്ടാകണം എന്നില്ല.. തനിക്ക് തുണ താൻ മാത്രം.. ”
പിറുപിറുത്തു കൊണ്ട് നന്ദിനി പുറത്തേക്ക് പോയതും പതിയേ ബെഡിന് സൈഡിൽ അവൾ കാണാതെ ചാറി വച്ചിരുന്ന ഫോൺ കയ്യിലേക്കെടുത്തു ആദർശ്.
എന്നിട്ട് നിരാശയോടെ അതിലെ വീഡിയോ റെക്കോർഡിങ് ഓഫ്‌ ചെയ്തു. ശേഷം റെക്കോർഡ് ആയ വീഡിയോയും പതിയെ ഡിലീറ്റ് ചെയ്തു.
‘ പുല്ല് വേണ്ടായിരുന്നു ‘
നിരാശയിൽ പതിയെ ബെഡിലേക്ക് ചാഞ്ഞു അവൻ. പുറത്തിറങ്ങിയ നന്ദിനിയും ആകെ അതിശയത്തിൽ ആയിരുന്നു.
ഇത്രയും ധൈര്യം തനിക്കെവിടുന്ന് കിട്ടി എന്നത് അപ്പോഴും അവൾക്ക് മനസ്സിലായില്ല. എങ്കിലും തെല്ലൊരു ആശ്വാസം തോന്നവേ ഫോൺ എടുത്ത് അനിലിന്റെ നമ്പർ ഡയൽ ചെയ്തു
” ആ അനിലേട്ടാ.. എനിക്കിനി വേറെ ജോലി നോക്കേണ്ട കേട്ടോ ഏട്ടൻ പറഞ്ഞ പോലെ ഞാൻ ഇവിടങ്ങ് നല്ലോണം അഡ്ജസ്റ്റ് ആയി..ഇനി പ്രശ്നം ഒന്നുമില്ല.. ”
കോൾ കട്ട് ചെയ്ത് അല്പസമയം മൗനമായി തന്നെ നിന്നു അവൾ. ശേഷം പതിയെ തന്റെ ജോലികളിൽ മുഴുകി തുടങ്ങി മനസമാധാനത്തോടെ…
