നീ എന്തിനാ ആ പൈസ എടുത്തേ, ആർക്കും വേണ്ടാതെ കിടന്നതാവും എന്ന് തോന്നി..

(രചന: Kannan Saju)

അവന്റെ ചന്തിക്കു അടിച്ചു കൊണ്ടു നിഷ അലറി “പറയടാ.. എവിടുന്നാ ഐസ് ക്രീം മേടിച്ചു തിന്നാൻ നിനക്ക് പൈസ കിട്ടിയത്?  “

സച്ചു വിതുമ്പാൻ തുടങ്ങി…

” മോങ്ങരുത്….  മോങ്ങിയ ഇനിയും വാങ്ങും നീ.. മര്യാദക്ക് പറഞ്ഞോ “.. ആറാം ക്ലാസ്സുകാരൻ വിഷമത്തോടെ അമ്മയെ നോക്കി…

” സത്യായിട്ടും വഴിക്കിടന്നു കിട്ടിയതാ “

” നീ എന്തിനാ ആ പൈസ എടുത്തേ ?  “

” ആർക്കും വേണ്ടാതെ കിടന്നതാവും എന്ന് തോന്നി ” വിതുമ്പിക്കൊണ്ട് അവൻ പറഞ്ഞു.. നിഷ സ്വയം നിയന്ത്രിച്ചു…

” നോക്കു…. ആ ഇരുപത് രൂപ മാത്രം കയ്യിൽ കരുതി വന്ന ആരുടേ എങ്കിലും ആണെങ്കിലോ?  ” സച്ചു ഒന്നും മിണ്ടിയില്ല…

” അവരു തിരിച്ചു വന്നു നോക്കുമ്പോ അത് കാണുവാ?  അവർക്കു വീട്ടിൽ പോവാൻ വേറെ പൈസ ഒന്നും ഇല്ലങ്കിലോ ?  ” അപ്പോഴും സച്ചു മൗനം പാലിച്ചു…

” എവിടുന്നാ നിനക്കാ പൈസ വീണു കിട്ടിയത്?  “

” ഇങ്ങോട് തിരിയുമ്പോ വളവിൽ “

നിഷ കയ്യിൽ ഇരുപത് രൂപയും എടുത്തു അവനെയും കൂട്ടി നടന്നു.. അവിടെ ചെല്ലുമ്പോൾ ഒരു വൃദ്ധൻ വടിയും കുത്തി പിടിച്ചു ചുറ്റും നോക്കി അവിടെ നിക്കുന്നുണ്ടായിരുന്നു..

” അപ്പാപ്പൻ എന്താ നോക്കുന്നെ.. ” അവൾ ചോദിച്ചു

” മോളേ എന്റെ ഒരു ഇരുപത് രൂപ ചാടി പോയി… നോക്കിട്ടു കാണുന്നില്ല… “

” ഇത… ഇവന് കിട്ടിയിരുന്നു.. ഇവൻ അറിയാതെ വീട്ടിലേക്കു കൊണ്ടു വന്നു… അപ്പാപ്പൻ ക്ഷമിക്കണം “

” അയ്യോ… എന്താ മോളേ ഇത്.. ഒരുപാട് നന്ദി ഉണ്ട്.. കയ്യിൽ ഇതേ ഉണ്ടായിരുന്നുള്ളു… വീട്ടിൽ പോവുന്നെ എങ്ങനെന്നു ആലോചിച്ചു നിക്കുവായിരുന്നു… മോളേ ദൈവം അനുഗ്രഹിക്കട്ടെ.. “

” കണ്ടോ.. ഇപ്പൊ എങ്ങനുണ്ട്?  നമ്മൾ വന്നില്ലായിരുന്നെങ്കിലോ..?  വെറുതെ കിട്ടിയാലും എടുക്കരുത് ട്ടോ.. അതിനി എന്തായാലും.. നഷ്ട്ടപ്പെട്ട്ടവൻ തേടി വരും.. ചിലപ്പോ അവനു അത് മാത്രമായിരിക്കും സ്വന്തമായി ഉണ്ടാവുക..

അതിന്റെ വില അവനെ അറിയൂ.. അത് നമുക്ക് മനസ്സിലാവണം എങ്കിൽ നമ്മളും ആ അവസഥ അനുഭവിക്കണം… ” അമ്മ തിരിച്ചു നടക്കും വഴിയിൽ അവനെ തലോടി പറഞ്ഞത് അവൻ ഓർത്തു….

” സച്ചു എന്തായി പൈസയുടെ കാര്യം ?  ” ഹോസ്പിറ്റലിൽ ഭിത്തിയിൽ ചാരി ഇരുന്നു പഴയ കാര്യം ഓർമിച്ച സച്ചുവിനോട് ഡോക്ടർ ചോദിച്ചു…

” വരും സർ… “

” എന്താ താമസം എത്രേം വേഗം ചെയ്യാൻ നോക്കു.. അമ്മക്ക് പ്രായമായതല്ലേ.. വൈകും തോറും റിസ്ക് ആണ് ” ഡോക്ടർ നടന്നകന്നു…

” ഈശ്വരാ.. അമ്മയുടെ ഓപ്പറേഷന് കരുതി വെച്ചിരുന്ന പണം വരുന്ന വഴിയിൽ ബസ്സിൽ നഷ്ടപ്പെട്ടെന്ന് ഞാൻ എങ്ങിനെ ഡോക്ടറോട് പറയും..

തിരഞ്ഞു മടുത്തു.. കുറച്ചു പേരോട് വീണ്ടും കടം ചോദിച്ചിട്ടുണ്ട്… എന്താവുമോ ദൈവമെ ” ചങ്കു തകരുന്ന വേദനയോടെ ഇരിക്കുമ്പോ സ്റ്റേഷനിൽ നിന്നും കോൾ വന്നു

” സച്ചു.. തന്റെ പണം അടങ്ങുന്ന ബാഗ് മാറി എടുത്ത ഒരാൾ സ്റ്റേഷനിൽ അതുമായി വന്നിട്ടുണ്ട്..” സച്ചു അറിയാതെ മുകളിലേക്ക് നോക്കി… ദൈവമേ… നന്ദി.. അവന്റെ കണ്ണുകൾ നിറഞ്ഞു…

” ദൈവം മോളേ അനുഗ്രഹിക്കട്ടെ ” അമ്മയുടെ നല്ല മനസ്സിന് അന്ന് അപ്പാപ്പൻ നന്ദി പറഞ്ഞത് ഓർത്തു കൊണ്ടു സച്ചു സ്റ്റേഷനിലേക്ക് ഓടി…

Leave a Reply

Your email address will not be published.